సోదర త్రయం లో రెండవవాడైన సింహ ముఖుడు అసురుడైననూ సర్వశాస్త్రములు తెలిసిన వివేకి . సహజమగు అసుర స్వభావం తో నాశము కోరి తెచ్చుకుంటున్న అన్నగారిని వరించ తన వంతు ప్రయత్నం చేస్తాడు . కానీ, ఫలితం శూన్యం . శూర పద్ముని పట్టుదల, పంతం యుద్ధానికే దారితీశాయి . శూర పద్ముని
మంత్రాంగం, మనోభీష్టం నారదమహర్షి సమయస్ఫూర్తి , సరస సంభాషణతో మరింత దృఢమవుతుంది . దేవతలపై , దండయాత్ర చేయాలనీ రాక్షసకోటి తీర్మానిస్తుంది .
శూర పద్ముడు అశేష సేన వాహిని తో అలకాపురిపై దాడి చేస్తాడు . ఎలాంటి ప్రతిఘటన లేకుండా కుబేరుడు శూర పద్ముడికి లొంగి పోతాడు . కానుకలు సమర్పించి రాక్షసపతిని ప్రసన్నం చేసుకుంటాడు .
సునాయాస విజయం తో విజృంభించిన శూర పద్ముడు అమరావతి పై దడి చేస్తాడు . అతడి ధాటికి నిలువలేని సురాధిపతి ఆకాశమార్గాన పారిపోతాడు . దానవేంద్రుడు అమరావతిని ధ్వంస మొనర్చి దేవ పత్నులను చెర పడతాడు . భీషణ అగ్నికీలల్లో అమరావతి శోభ దగ్ధమవుతుంటే వికటాట్టహాసం చేస్తాడు .
తదుపరి విజయ యాత్ర లో అగ్నిదేవుడు శూరునకు శరణాగతుడవుతాడు . శూర పద్ముని నాశనం ముందు యమధర్మం కూడా తలవంచుతుంది .
రాక్షసులు పాల కడలిని కలచి వేశారు . నీలాదేవి, శ్రీదేవి భయపడి శ్రీనివాసుని గట్టిగా కౌగలించుకున్నారు . శ్రీహరి యోగనిద్ర నుండి లేచాడు .
వైకుంఠ ద్వారం ముందు నిలిచిన శూర పద్ముడు విష్ణువుతో వైరం కోరినవాడు కనుక పరుష వాక్యములతో నిందారోపణలు ప్రారంభిస్తాడు . శూరుని మనసు తెలిసిన పద్మనాభుడు అతడితో సమరానికి సిద్ధమవుతాడు .
శ్రీహరి తో సమరానికి తలపడు సమయాన శూరపద్ముని అనుజుడైన తారకాసురుడు వైకుంఠవాసుని ఎదిరించే అరుదైన అవకాశం తనకు ప్రసాదించమని వేడుకుంటాడు .
తారకాసురుడు , వైకుంఠవాసుడు చిత్ర, విచిత్ర గతులలో కదనం సాగిస్తారు . పోరు ఎంతకూ ఓ కొలిక్కి రాదు . చివరకు విసిగిపోయిన మహావిష్ణువు రాక్షస వీరుడిపై చక్రాయుధం ప్రయోగిస్తాడు . కానీ, అది అతడి కంఠమందు బంగారు పతాకం గా ఒదిగిపోతుంది .
ఈ విచిత్ర పరిణామంతో దేవతలు తెల్లబోయారు . దేవతా రక్షకుడైన నారాయణుడే దానవుల ముందు ఓటమిని అంగీకరించవలసి వచ్చింది . ఇక వారిని రాక్షసుల బారి నుండి కాపాడే నాధుడెవ్వడు ?
విజయ గర్వం తో శూరపద్ముడు వైకుంఠమును వీడి సత్యలోకమునకు చేరుకున్నాడు . అతడితో పరమేష్ఠి మనుమడన్న చుట్టరికం కలిపి దీవిస్తాడు . బ్రహ్మ దీవెనతో బ్రహ్మానంద భరితుడైన శూరుడు చివరి మజిలీలో కైలాసం చేరాడు . అచట భూతనాథుని భక్తితో సేవించాడు . ఆయన దీవెనలు మెండుగా అందుకొని సోదరద్వయం తో స్వస్థలం చేరాడు .
కైలాసగిరి పై చెరగని చిన్ముద్రలో దక్షిణామూర్తి సనకసనందాది ఋషులకు మౌనవ్యాఖ్య ద్వారా జ్ఞానబోధ చేస్తాడు . అది అఖండమైన ఏకాంతం .
నారాయణ సహిత బ్రహ్మాదిదేవతలు, కైలాసపతిని ఆర్తిగా పిలిచారు . కపర్ది వారి పిలుపును అందుకొని సాక్షాత్కరించాడు . వారి మనోగతం గ్రహించిన మహేశ్వరుడు “ కుమార సంభవమునకు “ తరుణం ఆసన్నమైనది అని. దేవతలను ఊరడించి , సృష్టి, స్థితి, కారకులను తగు రీతిని గౌరవించి యధావిధిగానే మళ్ళీ చిన్ముద్ర ధారి అయినాడు .
సతీ వియోగము చే సదాశివుడు మౌన ముద్ర దాల్చాడు . పార్వతిగా మరు జన్మ ధరించిన పరాత్పర శివుని పొందుకై తపోదీక్షలో ఉన్నది . మరి , వీరిరువురి సమాగమం జరిగేదేప్పుడు ? కుమారుడు సంభవించేదెప్పుడు ?
బ్రహ్మ, విష్ణు , ఇంద్రాది దేవతలు సమావేశమయ్యారు . వారు తలచినంతనే మన్మధుడు రతీదేవితో ప్రత్యక్షమయ్యాడు . బ్రహ్మ అతడు నిర్వహించవలసిన కార్యం వివరిస్తాడు . ఆ పలుకులు విని మన్మధుడు నిలువెల్లా కంపించి పోతాడు . సదాశువుని పై సుమ బాణ ప్రయోగమా ? సతీ వియోగం తో భీష్మించుకున్న భూతనాథుని కదిలించటం భావ్యమేనా ? అలా చేయటం దుస్సాహసమవుతుందని మన్మధుడు వెనుకంజ వేస్తాడు . కానీ ఈ కార్యం అనివార్యం . పైగా చతుర్ముఖుని ఆనతి మీరితే అధోగతి తప్పదు . అంతకన్నా మహాదేవుని క్రోధాగ్నికి ఆహుతి కావటం ఉత్తమం . . తన ఆత్మార్పణ తో ఒక మహాకార్యం నెరవేరుతుందన్న తృప్తి తో మన్మధుడు మృత్యు కౌగిలి కి సిద్ధపడతాడు .
మన్మధుడు రతీ సమేతుడై సర్వ సన్నాహాలతో కైలాసగిరి చేరుకుంటాడు . ఆ తపోభూమిని క్షణాలలో రసరమ్యంగా మార్చివేస్తాడు . మోహాభినివేశం తో భార్యాసమేతుడై ఆ ప్రాంగణం లో నర్తిస్తాడు . నంది అక్కడ నిలిచి సర్వం మోదం తో తిలకిస్తాడు .
తన ప్రవేశానికి శివుని అభ్యంతరం లేదన్న నంది పలుకులు సుమశ రుని ఎదలో ఆత్మ విశ్వాసాన్ని ప్రోది చేస్తాయి . మహాదేవుని మనోగతం తనకు అనుకూలంగా ఉందని మన్మధుడు పొంగిపోతాడే తప్ప ఆ రుద్రమూర్తి మహాసంకల్పం ఊహించలేక పోతాడు . రెట్టించిన ఉత్సాహం తో చెరకు వింటిపై సుమశరాన్ని సంధిస్తాడు . పరిణామం ఎలా ఉంటుందోనన్న భీతితో రతీ దేవి గుండె చిక్కబట్టుకొని చూస్తుంటుంది .
సుమశరుడు సంధించిన పూలబాణం శంకరుని సమీపించి ఆ ఉగ్ర మూర్తిని తాకలేక తిరోగమిస్తుంది . ఈ పరిణామానికి అతడు తెల్లబోతాడు . చేష్టలుడిగి శంకరుని చూస్తుండిపోయాడు .
కొనసాగించండి 5 లో
